John P.Portelli

Huwa Professur fid-Dipartiment tal-Edukazzjoni (Ġustizzja Soċjali), u fid-Dipartiment tat-Tmexxija u tal-Edukazzjoni Ogħla u għall-Adulti fl-Università ta’ Toronto. Apparti ħafna impenji oħra ta’ tagħlim li jkollu, huwa għadu konsulent edukattiv fl-Università ta’ Malta, u huwa kelliem pubbliku versatili u mfittex, u anke kordinatur tal-proġetti fl-oqsma tal-edukazzjoni għaż-żgħażagħ u għall-adulti, u anke għall-ġustizzja soċjali.

Fejn tidħol il-kitba letterarja, l-ewwel tnemnim ta’ Portelli lejn is-sengħa beda ħiereġ fi żmienu bħala student f’Malta fil-bidu tas-70ijiet, u beda bil-poeżija. Meta kien Malta, Portelli kien membru attiv tal-gruppi letterarji u l-għaqdiet kollha fil-gżira, inkluż il-Moviment Qawmien Letterarju (kien l-iżgħar membru tiegħu meta kellu 16-il sena), l-Għaqda Letterarja Maltija, l-Għaqda Kittieba Żgħażagħ u l-Għaqda tal-Malti – Università, li kien is-segretarju tagħha għal xi żmien.

Il-pubblikazzjoni kellha tiġi ħafna wara, meta ħareġ il-ġabra bilingwi Bejn Żewġ Dinjiet/In Between (Melita Books) f’Toronto fl-2001. Żewġ ġabriet oħra tiegħu wkoll ħarġu bħala edizzjonijiet bilingwi, u dan kompla jikkonferma post Portelli bħala awtur maqbud bejn żewġ pajjiżi u lingwi. Dan l-aħħar, huwa beda jirfes ukoll fid-dinja tal-proża, u ħareġ rumanz u żewġ ġabriet ta’ novelli fi tliet snin, segwiti minn antoloġija tal-poeżiji bil-Malti biss – Imkien għall-Kenn (Horizons) fl-2020. Portelli jikkaratterizza l-kitba tiegħu tal-proża bħala forma ta’ attiviżmu, billi tittratta temi ta’ eżistenzjaliżmu kritiku, antikolonjaliżmu, u perspettivi fuq il-ġustizzja soċjali u l-ekwità, bl-esperjenza tal-immigranti titla’ fil-wiċċ f’ħafna mix-xogħlijiet tiegħu.

In-natura bilingwi tal-maġġoranza tax-xogħol ippubblikat tiegħu tilħaq aktar nies permezz tal-ħafna traduzzjonijiet ta’ xogħlu. Tnejn mill-ġabriet tal-poeżija tiegħu ġew tradotti għall-Franċiż u għall-Grieg, u t-traduzzjoni Ingliża tal-ġabra ta’ novelli tiegħu, Everyday Encounters (Word and Deed Publishing), ħarġet fl-2019. Xogħlijiet oħra tiegħu ġew tradotti għat-Taljan, għall-Għarbi, għar-Rumen, għall-Portugiż u għan-Nepali.

Sadattant, Portelli kien koeditur ta’ 11-il ktieb akkademiku, u ppubblika aktar minn mitt artiklu. Filwaqt li hu impressjonat bl-ammont kbir ta’ pubblikazzjonijiet letterarji f’Malta minn meta beda jippubblika s’issa, Portelli juri inqas entużjażmu dwar in-nuqqas ta’ kritika fl-industrija tal-pubblikazzjoni Maltija.