Carmel G.Cauchi

Cauchi twieled Birkirkara fl-1944, studja l-Liċeo u wara studja l-Kulleġġ tal-Għalliema San Mikiel, imnejn kiseb il-warrant ta’ għalliem. Għallem f’diversi skejjel primarji madwar il-gżira, u aktar tard laħaq assistent kap tal-Iskola Primarja Madonna tal-Minsija f’San Ġwann.

Rebaħ il-Premju Nazzjonali tal-Ktieb erba’ darbiet – fl-2002 u fl-2012 kiseb it-tieni post permezz ta’ xogħlijiet ta’ proża għat-tfal, filwaqt li fl-2006 u fl-2011 kiseb l-ewwel post fil-kategorija tal-Poeżija għat-Tfal u l-Proża għall-Adolexxenti, rispettivament. Għal ħames snin konsekuttivi kiteb l-iskritt għat-tfal tal-iskola primarja ta’ Birkirkara fil-Festival tad-Drama għall-Iskejjel, u fi tliet snin minnhom kiseb il-premju għall-aqwa skritt.

Minkejja li huwa l-aktar magħruf għall-kotba għat-tfal, jikteb ukoll għall-adolexxenti u għall-adulti. Ittraduċa diversi xogħlijiet għall-Malti mill-Ingliż u mit-Taljan, il-biċċa l-kbira tagħhom ta’ natura reliġjuża, bħal Don Bosco: il-Ħabib taż-Żagħżagħ (1989) u L-Anġli fil-Bibbja (2005). Fost il-kotba għat-tfal tiegħu nsibu diversi kollezzjonijiet tant maħbuba b’karattri bħal Pietru Pitravu, Betta Trombetta, Sardinellu, u Mastru Gerfex, flimkien ma’ stejjer, leġġendi, u avventuri oħrajn.

Kiteb diversi ġabriet ta’ novelli għall-adulti flimkien ma’ erba’ ġabriet ta’ poeżiji fosthom l-ewwel ġabra individwali tiegħu Passi fuq ir-Ramel (1983) li tiffoka fuq ir-relazzjoni tiegħu ma’ Alla, ommu, u nies oħra. Cauchi ħoloq ukoll il-kullana ta’ żewġ kotba, Stejjer għad-Diskussjoni (1996) u Stejjer Oħra għad-Diskussjoni (2010), li jinkoraġġixxu lill-qarrejja biex jimpenjaw ruħhom fir-riflessjoni u d-diskussjoni wara kull storja. Permezz tagħhom Cauchi jippreżenta lill-qarrejja diversi punti ta’ ħsieb marbuta ma’ kull storja. Ktieb ieħor fuq l-istess binarji huwa Pass Pass: Matul is-Sena (2019) li joffri riflessjoni għal kull jum tas-sena.

Cauchi għadu jikteb in-novelli u kotba tal-avventuri kemm għat-tfal kif ukoll għall-adulti. Jemmen fil-qawwa u l-arti tal-kitba u jħoss li sens qawwi ta’ osservazzjoni u ftit immaġinazzjoni huma l-ingredjenti ewlenin tal-kitba. Fil-fatt, dawn it-tnejn jinsabu fix-xogħlijiet ta’ Cauchi li, minkejja li sempliċi u bi stil ta’ konverżazzjoni bejn l-awtur u l-qarrejja, huma kollha minsuġa bi ħsieb u artistrija.