TyroneGrima

Il-passjoni tiegħu għall-kitba taf il-bidu tagħha minn tfulitu li fiha rawwem imħabba lejn il-qari u l-ħolqien tal-istejjer. Huwa ispirat minn kittieba rinomati bħal Graham Greene, Patricia Highsmith, Albert Camus u Isabel Allende, li b’xogħlijiethom jinfluwenzaw l-istil tal-kitba tiegħu. Minbarra li jiġi ispirat mill-kittieba, Grima jispira ruħu wkoll mid-dinja taċ-ċinema. Ngħidu aħna, filmmakers bħal Woody Allen u François Truffaut ħallew impatt fuqu permezz tal-avviċinamenti distinti u innovattivi tagħhom lejn l-istruttura tal-film u n-narrattiva.

Grima huwa attiv ħafna fix-xena teatrali lokali, kemm bħala drammaturgu kif ukoll bħala direttur. Fost xogħlijietu nsibu Antigone (2018), Zayden (2019), Agnes of God (2020), Mill-Kċina ta’ Connor (2020) u Zoom: Hybrid Performance (2021). Id-dramm Mill-Kċina ta’ Connor, li nkiteb u ttella’ waqt il-lockdowns tal-COVID-19 kien fost l-ewwel drammi teatrali lokali li ntwera direttament online.

L-ispiritwalità, ir-reliġjon u l-kwistjonijiet tal-LGBTQIA+ huma temi ċentrali fir-rumanz rebbieħ tal-Premju Nazzjonali tal-Ktieb, Frammenti (Merlin Publishers, 2021). Fih jesplora dawn it-temi permezz ta’ narrattiva distopika. Il-ġrajja ssegwi eroj bla isem f’dinja nieqsa mill-umani, u li fiha jieqaf il-ħin, b’eċċezzjoni għal Sophie, karattru misterjuż li l-eroj jiltaqa’ miegħu matul il-vjaġġ tiegħu.

Ir-rumanz huwa maqsum f’erba’ staġuni kalendarji, li jista’ jkun li jissimbolizzaw l-istadji tradizzjonali tal-bikja għat-telfa ta’ maħbub. Fil-qalba tal-istorja hemm il-memorji li għandu l-protagonist ta’ mħabba li ntemmet imma li għad għandha influwenza qawwija fuqu, tant li żżommu milli jimxi ’l quddiem fil-ħajja, u toħloq ġo fih sens ta’ telfa persistenti li ma jistax jaħrab minnha.

In-nuqqas ta’ mħabba fiżika, emozzjonali u spiritwali timbotta lill-protagonist lejn vjaġġ inċert u surreali, ambjentat f’pajsaġġ mimli forzi inviżibbli u viżjonijiet tal-biża’ li jċajpru l-linja bejn ir-realtà u l-illużjoni. Il-baħħ jinħass jissuġġerixxi li l-protagonist qed ifittex bidu ġdid. Madankollu, fit-tfittxija tiegħu għal dan, ikollu jħabbat wiċċu mad-deżolazzjoni tal-madwar fosthom binjiet abbandunati u toroq vojta – li l-għera sħiħa tagħhom tamplifika l-preżenza fl-assenza.

In-narrattiva tissuġġerixxi li t-tkabbir emozzjonali tal-eroj huwa marbut intrinsikament mal-vjaġġ fiżiku quddiemu – l-abbiltà tiegħu li jagħmel il-pass emozzjonali li jmiss hija riflessa fil-ħtieġa li jimxi fiżikament ukoll. Għal darba oħra, dan jitfa’ dawl fuq kif in-nuqqas ta’ mħabba f’kull forma waqqfet l-abbiltà tiegħu biex ifiq, jimxi ’l quddiem u possibbilment jagħlaq il-feriti miftuħa.

Grima joffri vuċi friska fil-letteratura Maltija billi jinseġ temi ta’ spiritwalità ma’ kwistjonijiet LGBTQIA+. F’xena letterarja relattivament żagħżugħa, xogħlu,  jimla spazju li qatt ma ġie indirizzat, u jwassal perspettivi u profondità ġodda. Grima jindirizza temi kumplessi b’sensittività u għarfien. Dan huwa sinifikanti meta tqis li dan iseħħ f’kuntest li fih l-istess temi ftit li xejn ġew ippreżentati.