MarleneSaliba

Wara li l-ewwel tentattivi tagħha fil-poeżija wasslu għall-pubblikazzjoni u għal reputazzjoni fi ħdan ix-xena letterarja lokali, Saliba ġiet assoċjata ma’ sett ta’ temi u motivi ewlenin li faċilment jintgħarfu. Fost dawn hemm il-meditazzjoni ta’ spazju u żmien kożmiċi, li twassalna biex nirriflettu kemm fuq iċ-ċokon tagħna fl-univers, imma anke fuq il-konnessjoni ħolistika tagħna miegħu, u l-potenzjal li għandna li ntejbu lilna nfusna u lis-soċjetajiet tagħna. Ix-xewqa li taqbad sens ta’ interkonnessjoni li tmur lil hinn miż-żmien hija msaħħa bil-qasam l-ieħor ta’ interess letterarju ta’ Saliba: l-esplorazzjoni ta’ moħħ missirijietna taż-żminijiet Neolitiċi, u l-wirt misterjuż li ħallew warajhom li, iżda, huwa wieħed li jindika nuqqas ta’ strutturi lesti għad-difiża fil-gwerra, u minflok juri li kienu jifhmu ċ-ċikli naturali b’mod intuwittiv u profond.

Saliba studjat il-letteratura Ingliża kemm f’Malta u kemm fir-Renju Unit. Kienet taħdem bħala assistenta librara, għalliema ġo skola, u eventwalment saret lettriċi tal-Ingliż full-time l-Junior College u anke l-Università ta’ Malta. Hija kienet tagħmel ir-riċerka part-time wkoll għall-Istitut tal-Istudji tal-Paċi u l-Kunflitti fi ħdan il-Fondazzjoni għall-Istudji Internazzjonali fl-Università ta’ Malta. Għandha Diploma fl-Immaniġġjar Professjonali tal-Istress u l-Konsulenza, u kemm-il darba mexxiet workshops fuq il-letteratura u l-iżvilupp tal-persuna, kif ukoll fuq l-edukazzjoni għad-drittijiet umani u għall-paċi ġewwiena.

Billi l-ewwel fażi tal-edukazzjoni tagħha kienet taħt il-kolonja Ingliża, l-ewwel pinzellata ta’ Saliba bl-idjoma letterarja kienet inevitabbilment bl-Ingliż – dan jidher fl-ewwel antoloġija tagħha tal-poeżija, Time-Faring (Formatek Limited), ippubblikata fl-1994. Filwaqt li nħarġet it-tieni edizzjoni ta’ din il-ġabra fl-2001, verżjoni bil-Malti ġiet ippubblikata fl-2014 bl-isem Nimirħu maż-Żmien (Faraxa Publishing). Għal Saliba, il-ġabra hija verżjoni separata mill-antoloġija oriġinali bl-Ingliż, u tqisha bħala aktar minn sempliċiment traduzzjoni.

It-tieni antoloġija ta’ Saliba kienet il-ġabra bilingwi Xbihat tal-Antenati/Ancestral Visions li ħarġet fl-2011. Il-ġabra tixhed l-interess ta’ Saliba fil-passat Neolitiku tagħna, u tinkludi illustrazzjonijiet fotografiċi ta’ siti Neolitiċi ewlenin.

Saliba tħoss affinità profonda mal-kittieba l-oħra fix-xena letterarja Maltija, u tittama li fiha jista’ jkun hemm aktar lok għall-istħarriġ tal-benefiċċji tat-terapija u l-fejqan permezz tal-letteratura.