LoranneVella
Bijografija
B’approċċ multidixxiplinarju li jaqsam il-konfini tal-ġeneru u tal-pjattaforma, xogħol Loranne Vella jkompli jikxef kif l-idjoma letterarja u drammatika Maltija hija kapaċi taddatta ruħha. B’karriera li tvarja mit-tagħlim sat-traduzzjoni, Vella ppubblikat ir-rumanz distopiku Rokit mal-Merlin Publishers fl-2018, li bih rebħet xi premji, u dan hu biss wieħed mill-eżempji tal-istorja tal-pubblikazzjoni twila u fejjieda tagħha mal-pubblikatur magħruf Malti.
Mur fil-biblijografija
Flimkien mal-kittieb kollega tagħha Simon Bartolo, Vella naqqxet isimha fl-istorja letterarja Maltija bit-triloġija tal-Fiddien lura fil-bidu tas-seklu 21, kotba li kisru r-rekords kollha tal-bejgħ u taw lil Malta l-perjodu ċkejken tagħha ta’ ġenn fuq il-fantasija għall-adolexxenti fi żmien il-furja fuq Harry Potter.
Vella kompliet tistħarreġ il-proża spekulattiva bil-ktieb Magna™ Mater (Merlin Publishers, 2011) u anke Rokit - it-tnejn jesploraw xenarji distopiċi immaġinarji li jinvolvu l-gżejjer Maltin, filwaqt li Rokit jitbiegħed daqsxejn mill-estetika tal-kotba għall-adolexxenti u joqrob aktar lejn rakkont oskur u kumpless ta’ vjaġġar fiż-żmien, ta’ rivoluzzjoni u l-bdil tal-identitajiet. Huwa rebaħ il-Premju Nazzjonali tal-Ktieb fl-2018.
Iżda lil Vella mhux lakemm nistgħu npoġġuha f’xi kexxun.
Vella bdiet bħala għalliema fil-Kulleġġ San Alwiġi, u mbagħad bdiet tgħallem l-Istudji Teatrali fl-Università ta’ Malta fejn damet ħames snin. Illum taħdem bħala traduttriċi mal-Parlament Ewropew. Vella kienet waħda mill-fundaturi tal-grupp teatrali Aleateia, li sal-lum għadu notevoli għall-approċċ indipendenti tiegħu, u għall-impenn tiegħu li jipproduċi xogħol oriġinali fuq il-palk Malti f’xena li sfortunatament għadha aktar magħrufa għall-produzzjonijiet impurtati Ingliżi. Din xi ħaġa li Vella reġgħet qabdet magħha meta għenet biex jitwaqqaf il-Barumbara Collective ma’ grupp ta’ persuni wkoll involuti fl-arti performattiva fi Brussell. Il-ġabra ta’ novelli ta’ Vella, mill-bieb ’il ġewwa (Ede Books, 2019), li tinkludi kollaborazzjoni mal-fotografu Zvezdan Reljić, kienet il-bażi għall-produzzjoni interdixxiplinarja tal-Barumbara Collective li ttellgħet fil-Valletta Contemporary fl-2018. Traduzzjoni bl-Ingliż ta’ dan ix-xogħol għandha toħroġ din is-sena mill-pubblikatur żgħir Praspar Press, ibbażat fir-Renju Unit.
Vella reġgħet ikkollaborat ma’ Simon Bartolo biex tikteb il-lirika għad-dramm tiegħu Il-Ħanina Maddalena, ibbażat fuq perjodu partikolari fl-istorja, u mtella’ fil-Festival Internazzjonali tal-Arti f’Malta tal-2018. B’kollaborazzjoni mal-artist Trevor Borg u flimkien mal-kontribut tiegħu għall-padiljun ta’ Malta fil-Biennale ta’ Venezja fl-2019, ‘Cave of Darkness’, hija kitbet ktieb tat-tfal bl-istampi bl-isem Smajna isimna taħt l-art.
Vella traduċiet ukoll aktar minn għaxar kotba tat-tfal għall-Malti għal Merlin Publishers, u għadha tipproduċi x-xogħol għall-Barumbara Collective.
Miktuba minn Teodor Reljić u maqluba għall-Malti minn Sephora Francalanza
