AudreyFriggieri

Friggieri twieldet Ħal Luqa fl-1968. Kisbet Baċċellerat tal-Arti fl-Edukazzjoni fl-1991, Maġisteru fl-Edukazzjoni fl-2005, u segwiet dawn permezz ta’ riċerka aktar profonda fl-Istudji taż-Żgħażagħ tant li fl-2023 kisbet dottorat f’dan il-qasam. Bħala parti mill-iżvilupp professjonali tagħha studjat ukoll il-Psikoterapija Sistemika Familjali u hija lettriċi tas-Soċjoloġija fi ħdan il-Fakultà tal-Benesseri Soċjali tal-Università ta’ Malta. Bejn l-2020 u l-2023 Friggieri ġiet afdata bl-irwol ta’ Kummissarju għall-Vjolenza Domestika u l-Vjolenza abbażi tal-Ġeneru f’Malta. F’dan l-irwol hija użat l-esperjenza u l-għarfien tagħha biex tqajjem kuxjenza dwar id-drittijiet tan-nisa, it-tfajliet u l-bniet, is-saħħa familjali u l-vittimizzazzjoni tat-tfal f’ambjenti domestiċi tossiċi.

Friggieri tħoss li l-kitba mhix passatemp imma preokkupazzjoni dwar il-ħajja. Hija interessata li tipperċepixxi l-familjari permezz ta’ modi li mhumiex familjari, u fl-interrogazzjoni ta’ dak li hu kkunsidrat ordinarju b’mod li jsir straordinarju. L-ewwel xogħol tagħha għat-tfal ġie ppubblikat fl-2013, u permezz tiegħu introduċiet lill-pubbliku l-karattru oriġinali ta’ Miss Ambrożja Pulis Kiftaranipenġini – għalliema eċċentrika b’poteri superumani li tieħu lill-istudenti tagħha f’avventuri fantastiċi ’l bogħod mill-klassi tradizzjonali, ħalli jitgħallmu billi jesperjenzaw sitwazzjonijiet differenti li jisfidawhom biex joħorġu minn qoxrithom u jużaw l-abbiltajiet ġewwinija tagħhom. Minn dak iż-żmien ’l hawn ippubblikat erba’ kotba oħra f’din is-serje.

Għal Friggieri, il-kotba għall-adulti tagħha huma fost l-aktar xogħlijiet importanti tagħha. Minn dawn, L-Iskjav ta’ Isabel (2019), intgħażel għall-lista finali tal-Premju Nazzjonali tal-Ktieb, u jittratta t-traġedja u l-kummiedja ta’ meta tħobb lil xi ħadd li la jista’ jħobbok lura u daqstant ieħor jaf qatt mhu se jirritorna l-imħabba tiegħu lejk. L-Istorja li Rrakkuntat Nina (2016) u Tangerine Glow (2017) huma ġrajjiet mimlija tama, disprament, u fl-aħħar mill-aħħar ta’ misteru, kif wara kollox huma l-imħabba u l-ħajja.

Bħalissa Friggieri qed tesperimenta bi ġrajja għall-adolexxenti, li tindirizza r-realtajiet klawstrofobiċi u paralizzanti ta’ kif is-soċjetà toħloq kxaxen biex in-nies jidħlu fihom, u kif permezz ta’ dawn il-kxaxen u l-mixja kontinwa wara l-aħħar tlellix tas-soċjetà fl-aħħar mill-aħħar imewtu dak li neħtieġu l-aktar biex ngħixu ħajja li tissodisfana. X’inhu dak li se jgħinna biex insibu lilna nfusna? Friggieri tisħaq li la għandna nidħlu u lanqas għandna nħallu min idaħħalna fi kxaxen mingħajr reżistenza!