AntoineCassar

Waħda mill-karatteristiċi ta’ Cassar hija l-użu tal-endekasillabu, li għandu eki importanti fl-isfera poetika Maltija, partikolarment fix-xogħlijiet tal-poeta nazzjonali Dun Karm Psaila li uża l-endekasillabu b’mod estensiv biex jesplora temi reliġjużi. Isem il-ktieb ta’ poeżija ta’ Cassar li rebbħu anke premji, Erbgħin Jum (EDE Books, 2017), fil-fatt jagħmel referenza għal episodju kruċjali fil-kalendarju reliġjuż Malti: l-erbgħin jum u l-erbgħin lejl li Ġesù Kristu qatta’ jsum fid-deżert, li jiġu ripetuti simbolikament kull sena bl-erbgħin jum ta’ sawm qabel l-Għid il-Kbir. Cassar juża dan il-kapitlu minn ħajjet Ġesù biex jaqsam il-vjaġġ spiritwali tiegħu – ħarsa sinċiera u ta’ diqa lejn it-tfulija li kellu b’missier abbużiv, iżda li fl-aħħar issir esperjenza katartika li tagħtih għan u timlieh bl-enerġija.

Fil-ħajja u f’xogħlu, Cassar huwa vjaġġatur, esploratur, rakkontatur u ambaxxatur, imma qatt mhu maħrub. Mhux b’kumbinazzjoni li l-poema tiegħu Passaport (2009; maħruġa mill-ġdid fl-2019 ma’ EDE) tiddiskuti dinja mingħajr fruntieri, li fiha s-saqajn u r-ruħ huma liberi biex jimirħu. Il-libertà tal-moviment u l-ispirtu emigratorju jieħdu forma tanġibbli u lingwistika fl-antoloġija ta’ sunetti ta’ Cassar, miktubin bil-Malti, bl-Ingliż, bit-Taljan u bl-Ispanjol, li ġiet ippubblikata fl-2008 bl-isem Mużajk: an exploration in multilingual verse (Edizzjonijiet Skarta). Mill-ġdid, Cassar jaqsam il-fruntieri u jiċċelebra l-mobbiltà bla ostakli billi jiċċaqlaq minn lingwa għal oħra fi ħdan il-poeżiji stess. Il-kumplessità tat-tifsir u l-mużikalità tal-ħoss jittraxxendu r-restrizzjonijiet imposti mill-vernakulari ta’ kwalunkwe waħda minn dawn il-lingwi.

Cassar jinqala’ wkoll għall-poeżija performattiva u pparteċipa f’għadd ta’ festivals tal-poeżija madwar id-dinja. It-tnedija ta’ Erbgħin Jum, li fiha ta l-ħajja lil kważi l-ktieb kollu akkumpanjat minn grupp mużikali, żgur se tibqa’ mfakkra bħala pass importanti fix-xena letterarja Maltija.